zamin madar se apne agar nikal jae
na jaane kaun sa manzar kidhar nikal jae
ab aaftab sawa-neze par utarna hai
girift-e-shab se zara ye sahar nikal jae
samar gira ke bhi aandhi ki KHu nahin badli
yahi nahin ki jaDon se shajar nikal jae
ab itni zor se har ghar pe dastaken dena
agar jawab na aae to dar nikal jae
main chal paDa hun to manzil bhi ab milegi 'nawed'
ye rasta mujhe le kar jidhar nikal jae
Ghazal
Zamin madar se apne agar nikal jae
Iqbal Naved