zamane ko zamane ki paDi hai
hamein wada nibhane ki paDi hai
ye duniya chand par pahunchi hui hai
tujhe lahore jaane ki paDi hai
zara dekho idhar main jal raha hun
tumhein aansu chhupane ki paDi hai
fasana hi haqiqat ban gaya hai
haqiqat ko fasane ki paDi hai
abhi jo sher likkha bhi nahin hai
abhi se wo sunane ki paDi hai
tere mehman wapas ja rahe hain
tujhe mehman-KHane ki paDi hai
wo tere dil mein aa baiTha hai 'momin'
tujhe diwar Dhane ki paDi hai
Ghazal
Zamane ko zamane ki paDi hai
abdurrahman momin