zabt-e-gham hai meri poshak meri izzat rakh
aatish-e-dida-e-namnak meri izzat rakh
khul na jae ye meri aks-farebi kisi din
aaina-KHana-e-idrak meri izzat rakh
meri miTTi se charagh-e-dar-o-diwar bana
dar-ba-dar kar ke meri KHak meri izzat rakh
partaw-e-dagh-e-guzishta ruKH-e-farda pe na Dal
gardish-e-saat-e-saffak meri izzat rakh
baDi mushkil se banai hai ye izzat main ne
jazba-e-kar-e-hawasnak meri izzat rakh
ya samundar se meri KHak juda kar 'shahid'
ya bana de mujhe tairak meri izzat rakh
Ghazal
Zabt-e-gham hai meri poshak meri izzat rakh
Shahid Zaki