yunhi hum par sab ke ehsan hain bahut
kyun kahen ki hum pareshan hain bahut
aankh mein rakh le ye manzar phir kahan
rah mein teri bayaban hain bahut
maut to aai hai aaegi magar
aur bhi jine mein nuqsan hain bahut
yaad rakhna bhi koi mushkil nahin
bhul jaane ke bhi imkan hain bahut
phir ghazal kahni hai hum ko aur hum
tash ke patton mein ghaltan hain bahut
aadmi achchhe hain is mein shak nahin
han magar 'alwi' musalman hain bahut
Ghazal
Yunhi hum par sab ke ehsan hain bahut
Mohammad Alvi