Yun nahin chain to ghaflat ka sitam aur sahi

yun nahin chain to ghaflat ka sitam aur sahi
hum ye samjhenge ki afzaish-e-gham aur sahi

tum na aaoge to kya jaan na jaegi meri
aamad-o-raft nafas ki koi dam aur sahi

kahte hain zulm ke baad aah karoge to kya
lashkar-e-jaur-o-jafa mein ye alam aur sahi

jhuk ke milne se tumhaare mujhe KHauf aata hai
go ye KHam aur sahi tegh ka KHam aur sahi

asl mein jalwa ye kis ka hai tu hi kah waiz
tera rab aur sahi mera sanam aur sahi

wada-e-wasl ki takrar pe kahte hain ki jhuT
inhin ahdon mein tere sar ki qasam aur sahi

jashn-e-jamshed mayassar hai ki dil rakhte hain
jam ye aur sahi saghar-e-jam aur sahi

KHub hai tum mein jafa ki na rahegi aadat
mere badle bhi raqibon pe karam aur sahi