yun hai teri talash pe ab tak yaqin mujhe
jaise tu mil hi jaega phir se kahin mujhe
main ne to jo bhi dil mein tha chehre pe likh liya
tu hai ki ek bar bhi paDhta nahin mujhe
Dhalte hi sham TuT paDa sar pe aasman
phir mera bojh le gaya zer-e-zamin mujhe
tabir jagti hui aankhon ko kya mile
ek KHwab bhi to shab ne dikhaya nahin mujhe
kanda hai mera nam jahan aaj bhi 'nasim'
pahchante nahin usi ghar ke makin mujhe
Ghazal
Yun hai teri talash pe ab tak yaqin mujhe
Iftikhar Naseem