Ye roz-o-shab milenge kahan dekhte chalen

ye roz-o-shab milenge kahan dekhte chalen
aae hain jab yahan to jahan dekhte chalen

zamzam piyen sharab piyen zahr-e-gham piyen
har har nafas ka raqs-e-jawan dekhte chalen

ho jaen rafta rafta hasinon ki KHak-e-pa
be-nam ho ke nam-o-nishan dekhte chalen

lahje mein rang ruKH mein nazar mein KHiram mein
ek jaan-e-jaan ka lutf-e-nihan dekhte chalen

aankhon se ungliyon se labon se KHayal se
jis jis badan mein jo hai saman dekhte chalen

ye jaan-o-tan jo pir hue gham ke bojh se
jate hue to un ko jawan dekhte chalen

KHushbu se jin ki ab bhi moattar hain baam-o-dar
in bastiyon mein un ke nishan dekhte chalen

zauq-e-yaqin ki husn-e-murawwat ki gham ki maut
jo kuchh dikhae umr-e-rawan dekhte chalen

khaen fareb rose uThaen naqab rose
har shaKHs kya hai aur kahan dekhte chalen

mana ki raegan hi gai umr-e-be-sabaat
phir bhi hisab-e-sud-o-ziyan dekhte chalen