Ye nim-baz teri ankhDiyon ke maiKHane

ye nim-baz teri ankhDiyon ke maiKHane
nazar mile to chhalak jaen dil ke paimane

sharab-e-shauq se bojhal labon ke paimane
teri nigah ko aise mein kaun pahchane

kahin kali ne tabassum ka raaz samjha hai
jo KHud chaman hai wo apni bahaar kya jaane

jo hosh mein tha to koi na mai-ba-jam aaya
bahak gaya hun to duniya chali hai samjhane

ajab nahin jo mohabbat mujhe samajh na sake
wo ajnabi hun jise zist bhi na pahchane

yahin sujud-e-mohabbat ki bastiyan thin kabhi
bata rahe hain ye dair-o-haram ke virane

kahin charagh jalane ki ho rahi hai sabil
bujha rahe hain yahan shama KHud hi parwane

fareb-e-mashriq-o-maghrib hain rahrawan-e-jadid
ye bad-nasib na aaqil hue na diwane

wo zinda hai jo bahe mauj-e-waqt ki rau mein
wo zinda-tar hai jo tufan mein Thairna jaane

main apni bazm se itna hi dur hun ki 'nushur'
meri nawaon se kuchh aashna hain begane