ye mohabbat ka war hai sahab
dil baDa sogwar hai sahab
har taraf log chhanw ke dushman
aur shajar saya-dar hai sahab
kyun mera dil KHizan-rasida hai
har taraf to bahaar hai sahab
panw rakhna sambhal sambhal ke yahan
hasraton ka mazar hai sahab
kya ajab hai ki hum ko KHud pe nahin
aap par eatibar hai sahab
pahla maqsad hai khelna tum se
sanwi jit haar hai sahab
panw haalat ki giraft mein hain
ishq sar par sawar hai sahab
gham se rishta bahut purana hai
mere bachpan ka yar hai sahab
aap 'ansar' ko jaante hi nahin
ye to yaron ka yar hai sahab
Ghazal
Ye mohabbat ka war hai sahab
Rashid Qayyum Ansar