Ye moajiza bhi mohabbat kabhi dikhae mujhe

ye moajiza bhi mohabbat kabhi dikhae mujhe
ki sang tujh pe gire aur zaKHm aae mujhe

main apne panw tale raundta hun sae ko
badan mera hi sahi dopahar na bhae mujhe

ba-rang-e-ud milegi use meri KHushbu
wo jab bhi chahe baDe shauq se jalae mujhe

main ghar se teri tamanna pahan ke jab niklun
barahna shahr mein koi nazar na aae mujhe

wahi to sab se ziyaada hai nukta-chin mera
jo muskura ke hamesha gale lagae mujhe

main apne dil se nikalun KHayal kis kis ka
jo tu nahin to koi aur yaad aae mujhe

zamana dard ke sahra tak aaj le aaya
guzar kar teri zulfon ke sae sae mujhe

wo mera dost hai sare jahan ko hai malum
dagha kare wo kisi se to sharm aae mujhe

wo mehrban hai to iqrar kyun nahin karta
wo bad-guman hai to sau bar aazmae mujhe

main apni zat mein nilam ho raha hun 'qatil'
gham-e-hayat se kah do KHarid lae mujhe