Ye kah ke raKHna Daliye un ke hijab mein

ye kah ke raKHna Daliye un ke hijab mein
achchhe bure ka haal khulega naqab mein

yarab wo KHwab haq mein mere KHwab-e-marg ho
aae wo mast KHwab agar mere KHwab mein

tahqiq ho to jaanun ki main kya hun qais kya
likkha hua hai yun to sabhi kuchh kitab mein

main aur zauq-e-baada-kashi le gain mujhe
ye kam-nigahiyan teri bazm-e-sharab mein

hain donon misl-e-shisha pa saman-e-sad-shikast
jaisa hai mere dil mein nahin hai habab mein

ye umr aur ishq hai 'azurda' ja-e-sharm
hazrat ye baaten phabti thin ahd-e-shabab mein