ye ishq-e-na-murad bhi kis gumrahi mein hai
khiDki mein jo kabhi tha wo chehra gali mein hai
har subh chheDti hain hawaon ki ungliyan
poshida ek phul jo nannhi kali mein hai
jaise har ek ang hai aankhen liye hue
kya turfa ehtiyat teri sadgi mein hai
nakaam zindagi ho ki nakaam ishq ho
jine ki aarzu to meri jaan sabhi mein hai
zardar-o-hukmaran mein insan ka ehtiram
agli sadi mein tha na ye ab ki sadi mein hai
tujh se bichhaD ke sab ki nazar mein rahega kya
ab tak to ye 'shakil' teri raushni mein hai
Ghazal
Ye ishq-e-na-murad bhi kis gumrahi mein hai
athar shakeel