ye apne aap pe tazir kar rahi hun main
ki apni soch ko zanjir kar rahi hun main
hawaon se bhi nibhani hai dosti mujh ko
diye ka lafz bhi tahrir kar rahi hun main
na jaane kab se badan the adhure KHwabon ke
tumhaari aankh mein tabir kar rahi hun main
daricha khole hue rang aur KHushbu ka
suhani-sham ko taswir kar rahi hun main
duaen mang rahi hun hawa rahe jahil
gharonda ret pe tamir kar rahi hun main
wo muntazir hai mera kab se KHud pe raat oDhe
'shabana' subh si taKHir kar rahi hun main
Ghazal
Ye apne aap pe tazir kar rahi hun main
Shabana Yousaf