ye abr-o-baad ye tufan ye andheri raat
ab ek moD pe aa ja rafiq-e-rah-e-hayat
hawa ke dosh pe mauj-e-ajal KHiraman hai
mariz-e-dahr pe tari hain naza ke lamhat
hayat ek taKHayyul nahin haqiqat hai
mujhe batai hai aadam ke azm ne ye baat
mere rafiq mohabbat ke din bhi aaenge
wahi hasin sawera wahi kunwari raat
wahi gulab ke mausam wahi sharab ke daur
wahi sharir ghaTaen wahi bhari barsat
sunai jaegi koyal ko ham-nawa kar ke
hasin phulon ko bhaunron ki ek raaz ki baat
ghazal ki Dal saja kar chaman ki dulhan ko
'salam' nazr karega suhag ki saughat
Ghazal
Ye abr-o-baad ye tufan ye andheri raat
Salam Machhli shahri