Ye aankhen hain to sar kaTa kar rahengi

ye aankhen hain to sar kaTa kar rahengi
kisu se hamein yan laDa kar rahengi

agar ye nigahen hain kam-baKHt apni
to kuchh hum ko tohmat laga kar rahengi

ye saffakiyan hain to jun murgh-e-bismil
hamein KHak o KHun mein mila kar rahengi

kiya hum ne malum nazron se teri
ki nazren tari hum ko kha kar rahengi

ye aaen hain to ek din aasman ko
jala kar khapa kar uDa kar rahengi

agar gardishen aasman ki yahi hain
to hum ko bhi gardish mein la kar rahengi

ye aankhen hain to ek din 'mushafi' ko
nigahon ke andar fana kar rahengi