yaqin se nikle to jaise guman ki zad mein hain
ye kya tazad hai hum kis ziyan ki zad mein hain
bahut tawil hain goya ruton ki zanjiren
nae shagufe sabhi raftagan ki zad mein hain
unhen nasib ho ab mawara koi saat
azal se peD bahaar-o-KHizan ki zad mein hain
wahi safar hai samundar bhi kashtiyan bhi wahi
hawaen ab ke magar baadban ki zad mein hain
suno charagh bujha do tamam KHeme ke
mere aziz shab-e-imtihan ki zad mein hain
jo hum pe arsa-e-KHush-manzari mein bit gain
kahaniyan hain magar kab bayan ki zad mein hain
Ghazal
Yaqin se nikle to jaise guman ki zad mein hain
Asad Badayuni