Yahi nahin ki faqat pyar karne aae hain

yahi nahin ki faqat pyar karne aae hain
hum ek umr ka tawan bharne aae hain

wo ek rang mukammal ho jis se tera wajud
wo rang hum tere KHake mein bharne aae hain

ThiThur na jaen hum is ijz ki bulandi par
hum apni sath se niche utarne aae hain

ye bund KHun ki lauh-e-kitab-e-ruKH ke liye
ye til sar-e-lab-o-ruKHsar dharne aae hain

laga rahe hain abhi KHeme gham ki wadi mein
hum is pahaD se daman ko bharne aae hain

tere labon ko mili hai shaguftagi gul ki
hamari aankh ke hisse mein jharne aae hain

'nisar' band-e-qaba kholna muhaal na tha
so hum jamal-e-qaba band karne aae hain