Yahi chinar yahi jhil ka kinara tha

yahi chinar yahi jhil ka kinara tha
yahin kisi ne mere sath din guzara tha

nazar mein naqsh hai subh-e-safar ki virani
bas ek main tha aur ek subh ka sitara tha

mere KHilaf gawahi mein pesh pesh raha
wo shaKHs jis ne mujhe jurm par ubhaara tha

KHiraj deta chala aa raha hun aaj talak
main ek roz zamane se jang haara tha

mujhe KHud apni nahin us ki fikr lahaq hai
bichhaDne wala bhi mujh sa hi be-sahaara tha

zamin ke kaam agar meri dastaras mein nahin
to phir zamin pe mujhe kis liye utara tha

main jal ke rakh hua jis alao mein 'amir'
wo ibtida mein sulagta hua sharara tha