yahan kaun is ke siwa rah gaya
zamana gaya aaina rah gaya
wo husn-e-sarapa wo husn-afrin
magar har koi dekhta rah gaya
chalo kya hua raushni hi to thi
yahan dekhne ko bhi kya rah gaya
hamari kuchh apni riwayat bhi thi
kitabon mein likkha hua rah gaya
KHudai ko bhi hum na KHush rakh sake
KHuda bhi KHafa ka KHafa rah gaya
muqaddar kahin kaj-kulahi kare
koi ghar mein mahw-e-dua rah gaya
kahin ek chup bhi rasa ho gai
koi bolta bolta rah gaya
Ghazal
Yahan kaun is ke siwa rah gaya
Gauhar Hoshiyarpuri