Yan KHak ka bistar hai gale mein kafani hai

yan KHak ka bistar hai gale mein kafani hai
wan hath mein aaina hai gul pairahani hai

hathon se hamein ishq ke din raat nahin chain
fariyaad o fughan din ko hai shab nara-zani hai

hushyar ho ghaflat se tu ghafil na ho ai dil
apni to nazar mein ye jagah be-watani hai

kuchh kah nahin sakta hun zaban se ki zara dekh
kya jae hai jis jae na kuchh dam-zadani hai

mizhgan pe mere laKHt-e-jigar hi nahin yaro
is tar se wo rishta aqiq-e-yamni hai

likh aur ghazal qafiye ko pher 'zafar' tu
ab taba ki dariya ki teri mauj-zani hai