yaaden chalen KHayal chala ashk-e-tar chale
le kar payam-e-shauq kai nama-bar chale
dil ko sambhaalte rahe har hadse ye hum
ab kya karen ki KHud tere gesu bikhar chale
har gam par shikast ne yun hausla diya
jis tarah sath sath koi ham-safar chale
shauq-e-talab na ho koi bang-e-jaras to ho
aaKHir koi chale to kis ummid par chale
ab kya karoge sair-e-saman-zar-e-arzu
rut ja chuki chaDhe hue dariya utar chale
rahon mein 'hosh' sang baraste hain har taraf
le kar ye karwan-e-tamanna kidhar chale
Ghazal
Yaaden chalen KHayal chala ashk-e-tar chale
Hosh Tirmizi