wo shaKH-e-gul ki jo aawaz-e-andalib bhi thi
hui jo KHushk to mere liye salib bhi thi
dayar-e-sang mein sar phoDti phiri barson
meri sada ki jo is daur ki naqib bhi thi
jo shama dur thi us ne faqat dhuan hi diya
usi ki lau se jala hun jo kuchh qarib bhi thi
sarisht-e-husn ajab hai ki wasl ke hangam
nigah-e-yar mein kaifiyyat-e-raqib bhi thi
sakun kahan ki main aashob-e-fikr rakhta hun
jo mahr tha to tamazat mera nasib bhi thi
Ghazal
Wo shaKH-e-gul ki jo aawaz-e-andalib bhi thi
Razi Akhtar Shauq