wo mere wajud ka sila hai
ya ruh ke waste rida hai
kis dil se lahu ki fasl boen
jab KHun hi KHun se juda hai
har shaKHs hai dushmanon ki zad par
ab mujh sa koi kahan raha hai
har samt udasiyan mili hain
haalat se bas yahi gila hai
chehre pe masarraten sajae
jo bhi ghamon mein pal raha hai
'manzar' ise jaanta main kaise
jo mujh ko kabhi nahin mila hai
Ghazal
Wo mere wajud ka sila hai
Jawed Manzar