Wo mere shisha-e-dil dil par KHarash chhoD gaya

wo mere shisha-e-dil dil par KHarash chhoD gaya
dayar-e-ruh mein ek irtiash chhoD gaya

qadam qadam pe hua jab munafiqat ka shikar
to apne shahr ki wo bud-o-bash chhoD gaya

wahan se manzil-e-irfan-e-zat dur na thi
wo jis maqam pe us ki talash chhoD gaya

wo shaKHs aap hi qatil tha aap hi maqtul
jahan jahan bhi gaya apni lash chhoD gaya

kamal darja tha us mein shuur-e-tisha-gari
mere wajud ko wo pash pash chhoD gaya

tha us ke dast-e-hunar mein bhi aazari ka kamal
magar wo apna hi but na-tarash chhoD gaya