Wo mera dost hai aur mujhse wasta bhi nahin

wo mera dost hai aur mujh se wasta bhi nahin
jo qurbaten bhi nahin hain to fasla bhi nahin

kise KHabar thi ki us dasht se guzarna hai
jahan se lauT ke aane ka rasta bhi nahin

kabhi jo phuT ke ro le to chain pa jae
magar ye dil mere pairon ka aabla bhi nahin

suna hai wo bhi mere qatl mein mulawwis hai
wo bewafa hai magar itna bewafa bhi nahin

wo so saka na jise chhin kar kabhi mujh se
main us zamin ke bare mein sochta bhi nahin

suna tha shahr mein har su tumhaara charcha hai
yahan to koi 'nafas' tum ko jaanta bhi nahin