wo log aaen jinhen hausla ziyaada hai
ghazal mein KHun ka masraf zara ziyaada hai
sab apne aap ko dohra rahe hain rah rah kar
wo is liye ki paDha kam likha ziyaada hai
ye sach hai koi farishta nahin mere andar
magar KHata ki ba-nisbat saza ziyaada hai
mera KHumar utar jae to ye faisla ho
teri sharab mein kya kam hai kya ziyaada hai
ghazal usi pe dar-e-iltifat kholti hai
jise lihaz riwayat ka ziyaada hai
Ghazal
Wo log aaen jinhen hausla ziyaada hai
Shakeel Jamali