wo kuchh is tarah chahta hai mujhe
apne jaisa bana diya hai mujhe
is tarah us ne KHat likha hai mujhe
jaise dil se bhula diya hai mujhe
gar nahin chahta tu pichhle pahar
kyun duaon mein mangta hai mujhe
jis pe phalte nahin dua ke peD
us zamin se pukarta hai mujhe
taKHliye mein na jaane kitni bar
likhte likhte haTa chuka hai mujhe
lamha lamha ugane ki dhun mein
qatra qatra Duba raha hai mujhe
wasta de ke mausamon ka 'nizam'
wo daraKHton se mangta hai mujhe
Ghazal
Wo kuchh is tarah chahta hai mujhe
Sheen Kaaf Nizam