wo jo tere faqir hote hain
aadmi be-nazir hote hain
dekhne wala ek nahin milta
aankh wale kasir hote hain
jin ko daulat haqir lagti hai
uff! wo kitne amir hote hain
jin ko qudrat ne husn baKHsha ho
qudratan kuchh sharir hote hain
zindagi ke hasin tarkash mein
kitne be-rahm tir hote hain
wo parinde jo aankh rakhte hain
sab se pahle asir hote hain
phul daman mein chand rakh lije
raste mein faqir hote hain
hai KHushi bhi ajib shai lekin
gham baDe dil-pazir hote hain
ai 'adam' ehtiyat logon se
log munkir-nakir hote hain
Ghazal
Wo jo tere faqir hote hain
Abdul Hamid Adam