wo jahan hain wahin KHayal mera
mustaqil ho gaya visal mera
pyar se dekha phir mujhe us ne
phir se ohda hua bahaal mera
wo jo pagal tha ab wo kaisa hai
aaise wo puchhta hai haal mera
apni yaadon ki raushni kam kar
is ne sona kiya muhaal mera
main hi aaunga apne raste mein
mere bhitar se Dar nikal mera
sath mere ghasiTta hai pal pal
thak ke saya hua niDhaal mera
is amawas mein phir se tanha hun
chand hai gar sharik-e-haal mera
TuTna hai jawab mein tum ko
aaj kuchh saKHt hai sawal mera
taki tu rah sake KHuda mujh mein
mujh se aaseb ab nikal mera
aaya pal bhar ko sar pe saya phir
dhup ko aa gaya KHayal mera
tu mujhe aazma na aur 'atish'
tera jalna bhi hai kamal mera
Ghazal
Wo jahan hain wahin KHayal mera
Swapnil Tiwari