Wo is andaz ki mujhse mohabbat chahta hai

wo is andaz ki mujh se mohabbat chahta hai
mere har KHwab par apni hukumat chahta hai

mere har lafz mein jo bolta hai mujh se baDh kar
mere har lafz ki mujh se wazahat chahta hai

bahana chahiye us ko bhi ab tark-e-wafa ka
main KHud us se karun koi shikayat chahta hai

use malum hai mere paron mein dam nahin hai
mera sayyaad ab mujh se baghawat chahta hai

wo kahta hai ki main us ki zarurat ban chuki hun
to goya wo mujhe hasb-e-zarurat chahta hai

kabhi us ke sawalon se mujhe lagta hai aise
ki jaise wo KHuda hai aur qayamat chahta hai

use malum hai main ne hamesha sach likha hai
wo phir bhi jhuT ki mujh se himayat chahta hai