wo ho ilaj-e-dard mudawa kahen jise
aisa to ho koi ki masiha kahen jise
pursan-e-haal koi nahin jis ka nam len
ek dard dil hi hai ki shanasa kahen jise
mushkil ye hai ki aap to sunte hi kuchh nahin
rudad-e-ishq wo ki fasana kahen jise
jalwe se dekhiye kahin aankhen jhapak na jaen
yun chashm wa ho zauq-e-tamasha kahen jise
allah aisi de tujhe taufiq ai junun
sar mein wo dhun samae ki sauda kahen jise
sab hasraton ko KHak mein zalim mila diya
ab dil mein kya raha ki tamanna kahen jise
ye bar-e-zindagi kahin halka na 'shauq' ho
itna to ho ki hasil-e-duniya kahen jise
Ghazal
Wo ho ilaj-e-dard mudawa kahen jise
Pandit Jagmohan Nath Raina Shauq