Wo harf-e-raaz ki mujhko sikha gaya hai junun

wo harf-e-raaz ki mujh ko sikha gaya hai junun
KHuda mujhe nafas-e-jabrail de to kahun

sitara kya meri taqdir ki KHabar dega
wo KHud faraKHi-e-aflak mein hai KHwar o zubun

hayat kya hai KHayal o nazar ki majzubi
KHudi ki maut hai andesha-ha-e-guna-gun

ajab maza hai mujhe lazzat-e-KHudi de kar
wo chahte hain ki main apne aap mein na rahun

zamir-e-pak o nigah-e-buland o masti-e-shauq
na mal-o-daulat-e-qarun na fikr-e-aflatun

sabaq mila hai ye meraj-e-mustafa se mujhe
ki aalam-e-bashariyat ki zad mein hai gardun

ye kaenat abhi na-tamam hai shayad
ki aa rahi hai damadam sada-e-kun-fayakun

ilaj aatish-e-'rumi' ke soz mein hai tera
teri KHirad pe hai ghaalib firangiyon ka fusun

usi ke faiz se meri nigah hai raushan
usi ke faiz se mere subu mein hai jehun