Wo be-ruKHi ki taghaful ki intiha kahiye

wo be-ruKHi ki taghaful ki intiha kahiye
ba-in-hama use kis dil se be-wafa kahiye

gham-e-hayat o gham-e-kaenat se haT kar
kisi ki qamat o gesu ka majra kahiye

wo munfail ho ki ho mushtail bala se magar
kabhi to haal-e-dil-e-zar-e-barmala kahiye

bataiye kaf-e-mahbub dast-e-qatil ko
lahu ke dagh ko gul-kari-e-hina kahiye

adab ka hai ye taqaza ki us ki mahfil mein
sukut-e-naz ko bhi naghma o sada kahiye

hum apne daur mein jis bankpan se zinda hain
use hum ahl-e-mohabbat ka hausla kahiye

'surur' hazrat-e-ghaalib ke rang mein bhi kabhi
hikayat-e-karam-e-chashm-e-surma-sa kahiye