wo be-dili mein kabhi hath chhoD dete hain
to hum bhi sair-e-samawat chhoD dete hain
jab un ke gird kahani tawaf karne lage
to darmiyan se koi baat chhoD dete hain
dua karenge magar us maqam se aage
tamam lafz jahan sath chhoD dete hain
diye hon itne ki KHwabon ko rasta na mile
to shahr apni riwayat chhoD dete hain
har ek shaKH pe jab sanp ka guman guzre
faqir kashf o karamat chhoD dete hain
jamal apne nazaron mein kho gaya ai dil
so us ki mez pe saughat chhoD dete hain
Ghazal
Wo be-dili mein kabhi hath chhoD dete hain
Ghulam Mohammad Qasir