wo bahut KHush hai KHitabaat-o-muraat ke sath
KHub badla wo badalte hue haalat ke sath
dil ke nazdik pare aankh se rahne wale
kya talluq hai teri yaad ka barsat ke sath
meri KHwahish ka zara bhi na rakha pas us ne
mujh ko lauTa diya KHat chand hidayat ke sath
nikhat-o-nur-o-ziya husn ki pahchan bane
ishq mansub hua baam-e-KHarabaat ke sath
main ne lauTa diye saughat-o-tahaif us ke
mujh ko manzur na thi shart inayat ke sath
Ghazal
Wo bahut KHush hai KHitabaat-o-muraat ke sath
Mohammad Abid Ali Abid