wo agar ham-KHayal ho jaen
KHatm sare malal ho jaen
wo hon aamada-e-jawab agar
hum sarapa sawal ho jaen
shahr walon ka hai KHuda hafiz
chor jab kotwal ho jaen
hai judai KHuda ki ek neamat
qurbaten jab wabaal ho jaen
hath se aas ka asa na gire
hausle jab niDhaal ho jaen
ho agar aap ki nigah-e-karam
be-hunar ba-kamal ho jaen
aao niklen ana ke KHol se ab
rabte phir bahaal ho jaen
hausla haar dun 'jalal' agar
kaam sare muhaal ho jaen
Ghazal
Wo agar ham-KHayal ho jaen
Qasim Jalal