waqt se pahle daraKHton pe samar aane lage
raat aai bhi nahin KHwab-e-sahar aane lage
main ne pahla hi qadam rakkha hai dariya mein abhi
KHair-maqdam ke liye kitne bhanwar aane lage
kya KHata ho gai sarzad main isi soch mein hun
sang ke badle meri samt guhar aane lage
is liye zill-e-ilahi se KHafa hain raaten
un ke aiwan mein kyun KHak-basar aane lage
aap kuchh aur hain aashiq ise kahte hain miyan
jis ko har chiz mein mahbub nazar aane lage
KHair mangen kisi dushman ke liye ab 'alam'
ain mumkin hai duaon mein asar aane lage
Ghazal
Waqt se pahle daraKHton pe samar aane lage
Alam Khursheed