waqt ki umr kya baDi hogi
ek tere wasl ki ghaDi hogi
dastaken de rahi hai palkon par
koi barsat ki jhaDi hogi
kya KHabar thi ki nok-e-KHanjar bhi
phul ki ek pankhuDi hogi
zulf bal kha rahi hai mathe par
chandni se saba laDi hogi
ai adam ke musafiro hushyar
rah mein zindagi khaDi hogi
kyun girah gesuon mein Dali hai
jaan kisi phul ki aDi hogi
iltija ka malal kya kije
un ke dar par kahin paDi hogi
maut kahte hain jis ko ai 'saghar'
zindagi ki koi kaDi hogi
Ghazal
Waqt ki umr kya baDi hogi
Saghar Siddiqui