waqt ki aankh se kuchh KHwab nae mangta hai
dil mera ek dua raat gae mangta hai
ek aawaz tah-e-ab bulati hai mujhe
ishq mujh se bhi wahi kachche ghaDe mangta hai
dard kahta hai kisi saat-e-tanha mein rahun
ek makan gahre samundar se pare mangta hai
zabt chahe use ruKHsat ki ijazat mil jae
ashk aankhon se mohabbat ke sile mangta hai
dasht dar dasht liye phirta hai mujh ko ye junun
imtihan ishq mein kuchh aur kaDe mangta hai
Ghazal
Waqt ki aankh se kuchh KHwab nae mangta hai
Humaira Rahat