Waqt-e-tazin jo dikhae wo safa sine ko

waqt-e-tazin jo dikhae wo safa sine ko
munh dikhane ki na phir ja rahe aaine ko

gham nahin mahfil-e-jaanan mein nahin sadr-nashin
us ne sine mein to jawe hai mere kine ko

ai sanam tujh ko jo pahuncha wo KHuda ko pahuncha
zina-e-arsh samajhta hun tere zine ko

shaal-e-shahi se ziyaada hai mujhe kamli-e-faqr
jaanta pashm barabar hun main pashmine ko

hum wo hatim hain ki jo surat-e-qarun ai 'shad'
sath le jaenge zar banT ke ganjine ko