Waise tum achchhi laDki ho

waise tum achchhi laDki ho
lekin meri kya lagti ho

main apne dil ki kahta hun
tum apne dil ki sunti ho

jhilon jaisi aankhon wali
tum behad gahri lagti ho

mauj-e-badan mein rang hain itne
lagta hai rangon se banti ho

phul hue hain aise raushan
jaise in mein tum hansti ho

jangal hain aur bagh hain mujh mein
tum in se milti-julti ho

yun to bashar-zadi ho lekin
KHushbu jaisi kyun lagti ho

aksar sochta rahta hun main
KHalwat mein tum kya karti ho

wo qarya aabaad hamesha
jis qarye mein tum rahti ho