Wafa ki shama jalao ki hum ghazal kah len

wafa ki shama jalao ki hum ghazal kah len
udas raat hai aao ki hum ghazal kah len

kisi ke sath guzare hue hasin lamho
tum aaj yaad to aao ki hum ghazal kah len

bikhere jao fazaon mein aaj tum naghme
sunao git sunao ki hum ghazal kah len

tumhaare husn ka charcha hai chand-taron mein
kabhi zamin pe aao ki hum ghazal kah len

kisi ki yaad ki mashal jala jala ke 'asar'
andhera gham ka miTao ki hum ghazal kah len