wafa-dari ghanimat ho gai kya
mohabbat bhi murawwat ho gai kya
adalat farsh-e-maqtal dho rahi hai
usulon ki shahadat ho gai kya
zara iman-dari se batao
hamein tum se mohabbat ho gai kya
farishton jaisi surat kyun bana li
koi hum se shararat ho gai kya
kitabat rokne ka kya sabab hai
kahani ki ishaat ho gai kya
mazar-e-pir se aawaz aai
faqiri baadshahat ho gai kya
ghaTaen puchhne ko aa rahi hain
hamari chhat ki haalat ho gai kya
ye kaisa jashn hai us ki gali mein
koi bandish ijazat ho gai kya
Ghazal
Wafa-dari ghanimat ho gai kya
Fahmi Badayuni