waqif hain hum ki hazrat-e-gham aise shaKHs hain
aur phir hum un ke yar hain hum aise shaKHs hain
diwane tere dasht mein rakkhenge jab qadam
majnun bhi lega un ke qadam aise shaKHs hain
jin pe hon aise zulm o sitam hum nahin wo log
hon roz balki lutf o karam aise shaKHs hain
yun to bahut hain aur bhi KHuban-e-dil-fareb
par jaise pur-fan aap hain kam aise shaKHs hain
kya kya jafa-kashon pe hain un dilbaron ke zulm
aison ke sahte aise sitam aise shaKHs hain
din kya hai balki dijiye iman bhi unhen
zahid ye but KHuda ki qasam aise shaKHs hain
aazurda hun adu ke jo kahne pe ai 'zafar'
ne aise shaKHs wo hain na hum aise shaKHs hain
Ghazal
Waqif hain hum ki hazrat-e-gham aise shaKHs hain
Bahadur Shah Zafar