wah kya hum ko banaya aur bana kar rah gae
wasl ka muzhda sunaya aur suna kar rah gae
le gaya shauq us ke dar tak phir kami himmat ne ki
halqa-e-dar ko hilaya aur hila kar rah gae
main ne jo apne dil-e-gum-gashta ki puchhi KHabar
sar hilaya muskurae muskura kar rah gae
ghairat-e-dushman ki KHatir meri ghairat lai rang
mujh ko mahfil mein bulaya aur bula kar rah gae
kaam rone se bhi 'saqi' apna kuchh nikla nahin
likkha qismat ka miTaya aur miTa kar rah gae
Ghazal
Wah kya hum ko banaya aur bana kar rah gae
Pandit Jawahar Nath Saqi