uTha ke dar se sar-e-rah biTha diya hai mujhe
mere sawal se pagal bana diya hai mujhe
kuchh is tarah se kaha mujh se baiThne ke liye
ki jaise bazm se us ne uTha diya hai mujhe
na KHud hi chain se baiThe na mujh ko baiThne de
mere KHuda ne sitara bhi kya diya hai mujhe
meri samai na sahra mein hai na ghar mein hai
naya ye muzhda-e-wahshat suna diya hai mujhe
main apne hijr mein tha mubtala azal se magar
tere visal ne mujh se mila diya hai mujhe
Ghazal
UTha ke dar se sar-e-rah biTha diya hai mujhe
Meer Ahmad Naved