ushshaq mein nam ho chuka hai
'kaifi' badnam ho chuka hai
kya puchhte ho mariz-e-gham ko
kaam us ka tamam ho chuka hai
aashiq ka na imtihan lo wo to
banda-e-be-dam ho chuka hai
kyun hum se na munh chhupa ke jaen
han aap ka kaam ho chuka hai
kya kaam hamein raha kisi se
jab apna hi kaam ho chuka hai
'kaifi' kab tak ye KHwab-e-ghaflat
mehr lab-e-baam ho chuka hai
Ghazal
Ushshaq mein nam ho chuka hai
Dattatriya Kaifi