Use mana kar ghurur us ka baDha na dena

use mana kar ghurur us ka baDha na dena
wo samne aae bhi to us ko sada na dena

KHulus ko jo KHushamadon mein shumar kar len
tum aise logon ko tohfatan bhi wafa na dena

wo jis ki Thokar mein ho sambhalne ka dars shamil
tum aise patthar ko raste se haTa na dena

saza gunahon ki dena us ko zarur lekin
wo aadmi hai tum us ki azmat ghaTa na dena

jahan rifaqat ho fitna-pardaz maulwi ki
bahisht aisi kisi ko mere KHuda na dena

'qatil' mujh ko yahi sikhaya mere nabi ne
ki fath pa kar bhi dushmanon ko saza na dena