us se mil kar bhi KHalish dil mein raha karti hai
wasl ko hijr se kya chiz juda karti hai
wo na manega pa har shab koi mauhum si aas
ek diya ban ke dar-e-dil pe jala karti hai
auj-e-ausan pe chaDh chaDh ke mohabbat ki sharab
jab utarti hai to kuchh aur nasha karti hai
tujh mein kya baat hai ai dil ki wafa-kesh ye aql
meri bandi hai magar kaam tera karti hai
na-gahan panja-e-qatil se main kya chhuT gaya
us ki hasrat mere jine ki dua karti hai
aasmanon mein uDa karte hain phule phule
halke logon ke baDe kaam hawa karti hai
Ghazal
Us se mil kar bhi KHalish dil mein raha karti hai
Mohammad Aazam