Uski aankhon pe man tha hi nahin

us ki aankhon pe man tha hi nahin
KHwab the KHwab-dan tha hi nahin

main taaqub mein chal paDa jis ke
dhul thi karwan tha hi nahin

do zamin-zad jis mein rah sakte
is qadar aasman tha hi nahin

gir paDa hun to raste ne kaha
tera mujh par to dhyan tha hi nahin

ek KHwahish thi do dilon ke bich
aur kuchh darmiyan tha hi nahin

hum ne phulon se KHub baaten kin
bagh mein baghban tha hi nahin

us ne chaha ki jaana jaun main
us se pahle jahan tha hi nahin

umr us mein guzar di 'mumtaz'
wo jo mera makan tha hi nahin